Story Transcript
Llingua asturiana y cultura
Jesús Rodríguez Martínez
LLINGUA ASTURIANA Y CULTURA
Jesús Rodríguez Martínez 2011
Llingua asturiana y cultura
Jesús Rodríguez Martínez
MIGUEL DE CERVANTES,
Rinconete y Cortadillo.
Jesús Rodríguez Martínez (Xixón, 1965) ye maestru de Llingua Asturiana n´Educación Primaria dende l´añu 2006. Llicenciáu en Ciencies de la Educación pola Universidá d´Uviéu, desendolca un llabor docente nel que se rellaciona la llingua asturiana coles distintes manifestaciones de la cultura.
Llingua asturiana y cultura amuesa delles fiches didáutiques pal trabayu nel aula, de mou que l´alumnáu algame bayura de conocencies sobro les distintes conceiciones culturales qu´amuesen les respeutives llingües, al tiempu que se puean facer xeres de llingüística comparada tomando como referencia´l llatín.
Llingua asturiana y cultura
Jesús Rodríguez Martínez
ÍNDIZ DE LES FICHES DIDÁUTIQUES CULTURA ASTURIANA Astures y romanos Ecoloxía y mediu ambiente n´Asturies La mar y los cais L´Amagüestu de les castañes Les teles y los vistíos tradicionales d´Asturies Xixón, sieglos XIX-XX Parque Isabel La Católica de Xixón Sienda del ríu Peñafrancía ARTE Y CULTURA El cine El fútbol Relixón y arte Pintores asturianos de los sieglos XIX-XX Van Gogh y la pintura impresionista Picasso y la pintura cubista LLINGUA Y LLITERATURA Llingua llatina LLingua castellana Llingua francesa
Llingua asturiana y cultura
Jesús Rodríguez Martínez
ASTURES Y ROMANOS
Fechura circular prerromana nel castru de Noega (Xixón) NOEGA, CASTRU DE LOS CILÚRNIGOS. Na fastera actual de la Campa Torres de Xixón los cilúrnigos,
un pueblu astur prerromanu, llevantaron pente medies d´una zona de viesques arrodiaes pola mar, el castru de Noega nos sieglos VI-V e.C. Les viviendes de planta circular y teyáu vexetal taben dientro d´una muria construyida con bloques -a presión- de piedra yá que nun conocíen el cementu.
LOS CILÚRNIGOS. El nome suyu vien del so vezu rellacionáu col trabayu metalúrxicu, yeren los
caldereros. Vistíen ropes y capes de llana y llinu, con sandalies de cueru. Desendolcaron l´agricultura (cultivos de maíz, escanda y cebada) y la ganadería bovina y ovina. Yeren tamién perbonos alfareros y ayalgueros, lo que-yos permitía comerciar pente medies del troquéu con dellos pueblos.
LOS ROMANOS. La romanización d´Asturies, que foi abegosa, fíxose dende la metá del sieglu II e.C.
fasta l´añu 19 e.C., nel que la finó Augusto. Los romanos conquistaron al entamu del sieglu I e.C. la fastera na que s´asitiaben los cilúrnigos. Dientro del castru de Noega los romanos llevantaron muries con más sofitu y cases de lladriyu de planta rectangular. La civilización romana dexó la so cultura (ciencia, arte, lliteratura, lleis, etc.) y la llingua suya (el llatín, d´au surde l´asturianu). LES TERMES ROMANES. Roma desendolcó´l so maxín nes obres d´inxeniería, como ye´l casu de les
termes romanes de Xixón, construyíes nel sieglu I d.C. nel llugar onde güei ta´l Campu Valdés. Camentaron una zona güeca pembaxo del suelu que s´enllenaba, dende unes calderes, con aire caliente qu´al xubir calecía´l suelu y poro l´agua pal bañu.
PARTES DE LES TERMES. Apodyterium: vestuariu, pa cambiase la ropa enantes y depués de los baños.
Frigidarium: sala con piscina d´agua frío, yera pa relaxar. Caldarium: sala de piscina con agua caliente, la zona más llograda pa relaxar. Sudatio: la sala pa sudar o sauna, emplegábase tamién pa curiar enfermedaes. Praefurnium: fornu pa calecer l´aire y darréu l´agua.
Guerreros astures (manzorga) y ciudadanos romanos (mandrecha)
Llingua asturiana y cultura
Jesús Rodríguez Martínez
ECOLOXÍA Y MEDIU AMBIENTE N´ASTURIES
Osu pardu nos montes asturianos EL MEDIU NATURAL. Asturies ye una de les rexones europees con más bayura biolóxica. Hai delles
especies vexetales autóctones como: carbayu, fresnu, carrascu, texu, bidul, faya, pinu, castañal y salguera. Nun mediu natural de monte, na so mayor parte, viven especies animales en peligru de desaniciu como: osu pardu, ferre palomberu, gallu montesín, llampariegu, llondra, esperteyu de les cueves, aigla real y xaronca verdina. Na mar habiten delles especies de pexes y de cetáceos. L´OSU PARDU (Ursus arctos). Mamíferu omnívoru qu´habita nel Cordal Cantábricu. Tien un pesu d´unos
200 kg, un llargor d'unos 2 metros, vive unos 20-25 años y pue algamar una velocidá de 50 km/h a les carrenderes. N´iviernu amenorga´l so ritmu cardiacu p´aforrar enerxía, baxándo-y namái qu´un pocoñín la so temperatura. L´amenaza cimera que tien l´osu n´Asturies ye la de los illegales cazadores furtivos qu´empleguen llazos de cable, dellos velenos y trampes bien dañibles. LA CEBERA DEL OSU. L´alimentación de so afáyase a los cambeos estacionales. Na primavera come
guaños de plantes verdes, con una alimentación práuticamente yerbívora. Nel branu xinta frutos de la viesca (arándanos, miruéndanos), miel y restos de yerbívoros xabaces. Na seronda aliméntase davezu de frutos secos (castañes, nueces y abeyotes de carbayu). Nel iviernu tien d´aprovechar la so grasa acumulao pa poder pasar el periodu de letía. ESPACIOS NATURALES D´ASTURIES. El paisaxe asturianu caltién delles reserves de la biosfera
como´l Parque Natural de Redes, el Parque Nacional de los Picos d´Europa y el Parque Natural de Somiedu. Asina mesmu, ye mui importante l´ecosistema de la Reserva Integral de Muniel.los nel SO. Na zona costera son cimeres les fasteres del Cabu Peñas (Gozón) y la d´El Cachucho (Ribeseya). L´ESGONCIAMIENTU DEL MEDIU AMBIENTE. Los espacios naturales, con abonda biodiversidá, tienen
dalgunes amenaces como: les quemes nes viesques, que calcinen el terrén; la contaminación de la mar y los ríos polos vertíos d´industries, o por accidentes como´l del barcu Castiellu de Salas en Xixón; l´ensugamientu les zones llentes, que fai bien secu´l tarrén y poro lleva a la perda d´especies vives; la fechura d´autovíes per zones de pasu d´animales; les mines a cielu abierto, como les qu´hai pa los conceyos de Degaña y d´Ibias.
La contaminación del agua afeuta a tolos ecosistemes
Llingua asturiana y cultura
Jesús Rodríguez Martínez
LA MAR Y LOS CAIS
El barcu de vapor emplegóse na segunda metá del s. XIX y al entamu´l s. XX ASTURIES Y LA MAR. El Principáu d´Asturies ye una rexón bañada en tol so norte pol mar Cantábricu.
La tradición pesquera ye bien antigua en cais como A Veiga, Tapia, Cuideiru, Avilés, Xixón, Tazones, Llastres y Ribeseya. Los pescadores asturianos desendolquen cuantayá la pesca de baxura (ensin alloñase muncho de la costa) y la d´altura (n´alta mar). EL CAI D´EL MUSEL DE XIXÓN. En 1905 la mayor parte de les xeres portuaries del conceyu de Xixón
treslladáronse del cai hestóricu d´El Fomento (güei puertu deportivu) pa la rodiada del cabu Torres, au s´asitió´l cai d´El Musel, ún de los cimeros d´España. El puertu pesqueru y la Rula (agora Sala d´Esposiciones Antigua Rula) de Xixón treslladáronse na década de 1980 de Cimavilla pa El Rendiellu n´El Musel. La Xunta del Puertu igua tolos servicios portuarios del cai xixonés. LES EMBARCACIONES PORTUARIES. El tránsitu marítimu nes costes asturianes amuesa la bayura
d´embarcaciones vistes nel trescursu de la hestoria, dende los primeros veleros, pasando polos vapores, fasta los más luxosos tresatlánticos d´anguaño. Tamién hai barcos de sofitu como los gánguiles, gabarres, remolcadores, guardacostes o buques, y dellos tipos de llanches y cabríes.
ESPECIES ZOOLÓXIQUES DEL MAR CANTÁBRICU. Hai bayura de pexe y de mariscu nes rules, como:
sardines, chicharros, pixín, cóngaru, llinguáu, amasueles, muxones, calamares, bonitu, etc. Nes fasteres del Cabu Peñas y El Cachucho apuerten davezu cetáceos como tolines, ballenes rorcuales, cachalotes y orques. Tamién hebo apresamientos nel Cantábricu d'exemplares vivos bien estraños como´l calamar xigante, especie que vive pa lo más fondo la mar.
El calamar xigante pue algamar unos 30 m de llargor
Llingua asturiana y cultura
Jesús Rodríguez Martínez
L´AMAGÜESTU DE LES CASTAÑES
La fueya y el frutu de la castañal AMAGOSTAR LES CASTAÑES. La pallabra asturiana amagüestu fai referencia a la foguera que se facía
nel campu p´asar les castañes. El Magüestu, o Amagüestu, forma parte de la cultura tradicional d´Asturies y enllaza perbién con aspeutos gastronómicos y folclóricos. RECOYER CASTAÑES. La castaña ye´l frutu de la castañal (Castanea sativa), árbol del país de fueya
caduco que podemos atopar nos montes del nuesu paisaxe. Pa garrar castañes hai de poner procuru y nun frayar les cañes al dimiles con llates, anque ye meyor pañales. La castaña sácase de dientro del oriciu con unes morgaces, pinces de madera mui llargues.
PREPARACIÓN DE LES CASTAÑES. A lo primero, hai que mozquetar les castañes pa que nun salten.
Darréu, si ye posible, les castañes tienen d´amagostase nun farol de fierro afuracao con un rabil pa movelu y pa que calezan toes al empar. Sobro la manera de comeles puen ser castañes, o bien madures (pilongues), o bien seques (mayuques). LA FOLIXA. Na seronda asturiana prepárase una fiesta bien guapa, acompangando les castañes con
dellos frutos secos (nueces y ablanes), bollos preñaos, lleche y sidra del duernu. Tamién son típicos los cantarinos (les piques), los bailles tradicionales y les cosadielles (agostu moyáu, castañes a estráu; setiembre secu, castañes en cestu).
La sidra ye un aspeutu cimeru pa entender l´Amagüestu
Llingua asturiana y cultura
Jesús Rodríguez Martínez
LES TELES Y LOS VISTÍOS TRADICIONALES D´ASTURIES
Telar artesanu de madera LA TRADICIÓN DEL TELAR N´ASTURIES. Les teles más emplegaes yeren les que se facíen de la llana y
el llinu, anque en dalgunes ocasiones trabayábase con seda y algodón. La llana sacábase del tosquiléu de les oveyes y el llinu del tallu fibrosu de la mesma planta. Los colores pa los tintes llográbense polo corriente de materiales naturales como la corteza d´árboles, cebolles, remolaches y delles plantes verdes. Nos telares, fechos de madera, iguábense les teles pa faer la ropa.
Traxes tradicionales asturianos LOS VISTÍOS TRADICIONALES. Les pieces principales del traxe de la muyer yeren la saya, el xustiyu,
el dengue, el mandil y el pañuelu. Los homes usaben calzón, camisa, xilecu y montera. Los más ricos llevaben capa. No que cinca al calzáu, había escarpinos, coricies, madreñes, zapatos, botes de caña curtia y polaines. La celebración de les romeríes na Asturies rural yera un momentu bien afayadizu pa llucir los traxes de gala tradicionales al ritmu de la música del tambor y la gaita con cantarinos, bailles o dances típiques como les d´El Pericote y la Danza Prima.
Bailles y música nuna romería asturiana
Llingua asturiana y cultura
Jesús Rodríguez Martínez
XIXÓN SIEGLOS XIX-XX
Antiguu Teatru Xovellanos (1853-1934) na cai Institutu EL XIXÓN DEL SIEGLU XIX. La Revolución Industrial entama n´Asturies na segunda metá del sieglu
XIX. Aportó de forma tardía, en rellación a Europa, el pasu de la producción artesanal a la industrial en cadena. En dellos talleres y fábriques espeyáronse les diferencies ente les clases sociales de la dómina: la burguesía (propietarios capitalistes) y el proletariáu (trabayadores asalariaos). LES TRESFORMACIONES DEL SIEGLU XX. El sieglu XX traxo, amás d´importantes cambeos na
configuración urbana xixonesa, el réxime franquista tres la Guerra Civil (1936-1939) y la Monarquía Constitucional (dende 1978) qu´anguaño hai nel Estáu democráticu español. LLUGARES Y ARQUITEUTURA D´INTERÉS DEL VIEYU XIXÓN. Arcu del Infante (1782), Real Institutu
Xovellanos (1796), Fábrica de Cigarros de Cimavilla (1842), Fábrica de Vidrios Cifuentes (1844), Fábrica de Buxíes y Xabones (1847), Antiguu Teatru Xovellanos (1853), Estación Ferrocarril de Llangréu (1853), Muelle de Liquérica (1859-1864), Fábrica de Chicolates La Primitiva Indiana (1860), Casa Conceyu (1865), Aduana y Muelle Victoria (1871), Paséu Alfonso XII (1875), Fábrica de Chicolates de Zarracina (1877), Estación Ferrocarril del Noroeste (1874), Fábrica de Loza (1876) y Fundición Moreda (1879). LES NUEVES FECHURES. Foi bien importante pal desendolque de la cultura xixonesa´l Teatru-Circu
Obdulia/Cine Los Campos Elíseos (1872-1964), onde se pudieron ver les meyores obres teatrales, escéniques y cinematográfiques de la época. Yá nel sieglu XX, son representatives la igua del Parque d´Isabel la Católica (1950), la fechura del Estadiu d´El Molinón (1908-remocicáu pal Mundial de Fútbol de 1982) y la escultura d´Eduardo Chillida L´Eloxu l´Horizonte (1989), asitiada nel Cerru Santa Catalina que-y da gran prestixu artísticu a la villa.
El tranvía foi´l mediu principal de tresporte públicu fasta la década de 1960
Llingua asturiana y cultura
Jesús Rodríguez Martínez
PARQUE ISABEL LA CATÓLICA DE XIXÓN
Estatua de la Reina Isabel la Católica (1969) nel parque xixonés al que-y da´l so nome UN GRAN PARQUE. El Parque Isabel La Católica de Xixón asítiase pa la oriella del ríu Piles nuna zona
qu´a mediaos del sieglu XX yera una gran llamuerga. Polos permalos golores y pola abondanza de mosquitos l´Ayuntamientu decidió enllenar el llugar con escombros y faer una zona verde pa la ociosidá de la ciudadanía. Les obres desendolcáronse ente 1941-1950 nuna gran superficie d´unos 152.000 m2. El parque tien dos llagunes, una bien grande conocida como l´Estanque de los coríos. L´AGRANDAMIENTU DEL PARQUE. En 1959 iguóse una zona pa xuegos infantiles, remocicada en 2007.
Ente 1962-1966 llevantóse´l Parque Infantil de Tráficu, y en 1970 fíxose una ampliación pa la otra marxe del ríu pa construyir el nomáu Parque Inglés, dende 2007 Parque Hermanos Castro. Llenden col parque´l Parador Nacional Molín Vieyu y l´estadiu municipal d´El Molinón, qu´ocupen la fastera au taba l´antiguu y pergrán molín que-y daba´l nome a la zona. BIOLOXÍA. Nel parque hai bayura d´especies vexetales como: pláganu, salguera, pinu, lloréu, palmera
datilera, umeru, fresnu, álamu y rosal. Tamién habiten nel entornu delles especies d´aves de les families: Laridae (gaviotes), Rallidae (pita d´agua), Ardeidae (garcia real), Phasianidae (pavu real), Phalacrocoracidae (pucagón), Passeriforme (gurrión), Columbidae (palomba) y Anatidae (coríu). EL XARDÍN DEL ARTE. El Parque Isabel La Católica abelluga un importante patrimoniu artísticu con
delles obres d´arquiteutura y escultura. Destaquen enforma les obres del escultor Manuel Álvarez Laviada: Bustos de Nicanor Piñole y Evaristo Valle (1951), Monumentu de Xixón al doctor Fleming (1955), Les Driades (1962), Diana Cazadora (1967). Otres obres d´interés son el Monumentu a les víctimes de la Guerra Civil (1954) y la Estatua de la Reina Isabel la Católica (1969). Acompanguen a estes obres dellos cruceiros, pequeñes escultures y bancos de piedra, fontes d´estilu modernista, palombares y la casa del xardineru.
Clasicismu na escultura Les Driades (1962) de Manuel Álvarez Laviada
Llingua asturiana y cultura
Jesús Rodríguez Martínez
SIENDA DEL RÍU PEÑAFRANCÍA
Dir en bicicleta ye una forma bien prestosa pa facer la sienda LA SIENDA. La sienda del ríu Peñafrancía de Xixón ye un bon exemplu p´algamar delles conocencies
sobro los patrimonios natural y etnográficu d´Asturies. El camín entama na ponte La Guía y fina nel llavaderu de Deva. Tien un llargor d´unos 6 km y pue facese nunes dos hores caleyando, o sobro 45 minutos en bicicleta. Puen garrase enllaces pa la sienda fluvial del ríu Piles y pa la llitoral del Cervigón.
Ilesia de San Salvador de Deva (sieglu X) ASPEUTOS CULTURALES. A lo llargo del percorríu puen vese edificios y llugares d´interés como la
Escuela Superior d´Inxeniería, el campu golf d´El Tragamón, la torre de la Universidá Llaboral y el Xardín Botánicu Atlánticu. Na parroquia de Cabueñes atopamos la capiella de La Nuesa Señora de la Corrada y la Casa de los García-Xove. En Deva alcontramos la Quinta del Conde, la ilesia de San Salvador y el Güeyu Deva (conxuntu de fonte y llavaderu). L´ENTORNU NATURAL. Na fastera de la sienda hai delles especies d´árboles como carbayos,
castañales, fresnos y pumares nes quintanes. En cuantes a los animales, hai delles aves xabaces como´l coríu de ríu y el ferre. Nes caseríes topamos pites, coríos, caballos, oveyes, vaques y xatos.
Ponte del ríu Peñafrancía au´l Güeyu Deva
Llingua asturiana y cultura
Jesús Rodríguez Martínez
EL CINE
LOS ANICIOS DE LA CINEMATOGRAFÍA. La hestoria del Séptimu Arte entama en 1895 nel Café de
París coles proyeiciones curties de los hermanos Lumiere. Al comienzu del sieglu XX cueye puxu la industria norteamericana y ente 1915-1929 desendólcase´l cine mudu con filmes como L´acorazáu Potemkin (1925) del direutor soviéticu Einsenstein. El cine cómicu de los años venti tien en Charlot el so esponente cimeru.
EL CINE SONORU. La primer película del cine sonoru foi El cantante de jazz (1928), a la que-y
siguieron obres de Vidor (Aleluya, 1929), Lubitsch (El desfile del amor, 1930) y Sternberg (L´ánxel azul, 1930). La Segunda Guerra Mundial (1939-1945) llevó faer nos Estaos Xuníos un tipu de cine más fondu y de reflexón con títulos de cultu pal cinéfilu como: El gran dictador (1940), de Chaplin; Ciudadanu Keane (1941), d'Orson Welles; El ferre maltés (1942), de John Huston. EL PUXU DE LA INDUSTRIA D'HOLLYWOOD. Nos años 1940-60 foi mui bonu´l trabayu del direutor
británicu Alfred Hitchcock en películes que nun se puen escaecer como Rebeca (1940), Vértigu (1958), Cola muerte tres los calcaños (1959), Psicosis (1960) y Los páxaros (1963). Na década de 1970 ñaz un cine nuevu tipu de cine afayadizu pal gustu del públicu y efeutivu reflexáu en filmes de gran éxitu de recaudación como: El padrín (1972), de Francis Ford Coppola; Tiburón (1975), de Spielberg; La guerra de les galaxes (1977), de George Lucas. Nel cine d´anguaño son bien populares les sagues d´El Señor de los Aniellos y d´Harry Potter. EL CINE HISPANU. Dientro del cine en llingua castellana destaquen direutores como Luis Buñuel
(1980-1983), autor de filmes bien polémicos como Esi escuru oxetu del deséu (1977). El direutor madrilanu José Luis Garci ganó´l primer Oscar pal cine español con Volver a empezar (1983), película rodada n´Asturies. Ente otros actores y actrices del cine español hai de destacar los trabayos de Fernando Rey, Alfredo Landa, Francisco Rabal, José Luis López Vázquez, Sara Montiel, Antonio Banderas y Javier Bardem. Dientro de los direutores nacionales destaquen enforma los trabayos del manchegu Pedro Almodóvar (n. 1942), ganador de dellos premios Oscar. LOS XÉNEROS Y LOS PROTAGONISTES. Sobro los xéneros pue falase de cine: mudu, d´aventures,
hestóricu, bélicu, negru, de suspense, de mieu, románticu, musical, del oeste, de comedia, d´humor, de ciencia ficción, d'aición y de dibuxos animaos. Na hestoria universal del cine tien de señalase la presencia de grandes actores y actrices del cine norteamericanu (ente 1930-1980) como Gregory Peck, Charlton Heston, Paul Newman, Gary Cooper, Greta Garbo Ingrid Bergman y Katherine Hepburn. LA TÉUNICA Y LOS COMPLEMENTOS. Pa rodar una película de cine necesítense delles erbíes téuniques
como la cámara y los modernos ordenadores pa llaborar los efeutos especiales, ensin escaecer los acompangamientos como´l guión, la producción, la fotografía, el vestuariu, los decoraos y la música. CINE N´ASTURIANU. Dende l´entamu de la década de 1990 ta faciéndose cine en llingua asturiana
(sobro too curtiumetraxes), con direutores importantes como Ramón Lluis Bande. N´Internet, la estaya del Youtube amuesa versiones n´asturianu de películes mui famoses nos últimos años como: El xilecu de fierro, L´Exorcista, Rambo, Indiana Jones, Atopando a Nemo, El Rei Lleón y Los Simpson. Ye importante l´aportación del Festival Internacional de Cine de Xixón que se celebra dende 1963.
Llingua asturiana y cultura
Jesús Rodríguez Martínez
EL FÚTBOL
Balón y botes pa xugar al fútbol Pal exerciciu de cada deporte tien d´emplegase'l material afayadizo LOS ANICIOS DEL FÚTBOL. El fútbol tuvo´l so orixe nos xuegos militares con esferes de l´Antigua
China (sobro´l 2.500 e. C.), si bien el balompié modernu iguóse nel añu 1863 cola creación en Llondres de la Foot-ball Association. El primer partíu internacional fíxose en 1872 en Glasgow au xugaron les seleiciones d´Escocia ya Inglaterra (0-0). LOS CAMPEONATOS MUNDIALES. El fútbol ye deporte olímpicu dende 1904, anque la competición
cimera ye´l Mundial de Fútbol, celebráu per primer vegada n´Uruguái en 1930. Les seleiciones más importantes de la hestoria son Brasil, Alemaña, Italia, Arxentina y Uruguái. España quedó en cuartu llugar en Brasil 1950 y ganó´l Mundial de 2010 celebráu na República Surafricana.
EL PALLABRERU DEL FÚTBOL. Participantes y equipu téunicu: alevín, árbitru, benxamín, entrenador,
llinier, masaxista, porteru. El tarrén de xuegu: área, banderín, llargueru, llinies de campu, portería, puntu penalti, rede, valla. El campu fútbol: afición, aficionáu, bancu, graes, marcador, palcu, tribuna, vestuariu, xiblatu. Equipamientu: aguyetes, balón, botes, calzón, camiseta, camiya, chándal, dorsal, medies, tacos. Xugaes: agarrón, atacar, atayar, baruyu, cartulines (mariella, collorada), despexar, penalti, tiru. Partíos: caseru, lliga, maizón, paquete, peleón, seleición, resultáu, tiempu descuentu. REAL SPORTING DE XIXÓN. El Sporting fundóse en 1905 y dende 1908 xuega nel estadiu municipal
d´El Molinón. Viste camiseta con franxes colloraes y blanques, con pantalón y medies azules. Destacó abondo ente 1979-1983 nel fútbol español al llograr un subcampeonatu de Lliga y dos de Copa. Grandes xugadores del equipu xixonés foron, ente otros, los internacionales Campanal, Churruca, Ferrero, Quini, Joaquín, Jiménez, Cundi, Mesa, Ablanedo II, Abelardo, Luis Enrique y David Villa.
Quini celebra un gol del Real Sporting n´El Molinón
Llingua asturiana y cultura
Jesús Rodríguez Martínez
RELIXÓN Y ARTE
Símbolos de les principales relixones del mundiu EL FENÓMENU RELIXOSU. La relixón (del llat. religio-religiōnis) ye un conxuntu de creyencies y
práutiques relatives a lo qu´un individuu o grupu cuida como sagrao, en particular la divinidá. Los moos d´espresión relixosa son, na so primer etapa, el mitu, el símbolu y les actitúes de cultu; nuna segunda etapa tán les revelaciones, les profecíes, la igua social y la llexislación.
CLASIFICACIÓN DE LES RELIXONES. Formes primitives de la relixón: animismu, fetichismu y manismu
(cultu domésticu a los espíritos familiares). Formes superiores de la relixón: politeísmu (cultura clásica grecorromana), henoteísmu (atribuyir a una deidá les carauterístiques d´otros dioses), monoteísmu (xudaísmu, cristianismu, islamismu) y sistemes filosófico-morales (budismu, brahmanismu, confucianismu, taoísmu). RELIXÓN YA HESTORIA D´ASTURIES. Cola cayida del Imperiu Romanu d´Occidente nel sieglu V d.C.
lleguen a Asturies pueblos bárbaros de centru Europa. Los más organizaos d´éstos yeren los godos que van constituyir la Monarquía Asturiana (718-909), sofitu de la Reconquista llevada na península escontra los árabes invasores. Los reis asturianos, qu´aceutaron el cristianismu, foron: Pelayu, Favila, Alfonsu I, Fruela, Aureliu, Silu, Vermudu I, Alfonsu II, Ramiru I, Ordoño I y Alfonsu III. ARTE PRERROMÁNICU ASTURIANU. El Reinu d´Asturies dio llugar al desendolque de dellos estilos del
arte godu asturianu, definíu como prerrománicu. Na dómina d´Alfonsu II (ente 791-842) destaquen les ilesies de Santuyano (Uviéu), la Cámara Santa d´Uviéu y la obra orfebre de la Cruz de la Victoria. Demientres el reináu de Ramiru I (ente 852-850) llevantáronse los monumentos del Naranco d´Uviéu, Santa María (inicialmente Palaciu Real) y el templu de San Miguel de Lliñu, amás de la ilesia de Santa Cristina de L.lena. Finalmente, de la época d'Alfonsu III (ente 866-910) destaquen la ilesia de Santu Adrianu de Tuñón y el Conventín de Valdedios (Villaviciosa).
Monumentu prerrománicu asturianu de San Miguel de Lliñu (S. IX)
Llingua asturiana y cultura
Jesús Rodríguez Martínez
PINTORES ASTURIANOS DE LOS SIEGLOS XIX-XX
Nicanor Piñole (1878-1978). Autorretratu (1907)
LA ILLUMINACIÓN PICTÓRICA. Les obres del pintor xixonés Nicanor Piñole, influyíes pol coloríu y la
lluz del Impresionismu galu, amuesen téuniques bien trabayaes d´illuminismu, que proyeuta nos temes de la cultura asturiana y nos paisaxes, nos qu´afita les sos señes d´identidá. Pintures d´enriba, d´izquierda pa derecha: Recoyendo la mazana (1922), Paisaxes de Carreño (1932) y La Rula (1952).
Evaristo Valle (1873-1951). Autorretratu Colón (1948)
VANGUARDISMU. Ye bien importante la influyencia del postimpresionismu francés nes fechures del
artista xixonés Evaristo Valle, lo mesmo na presencia de la lluz y el color, como nel tratu de los temes paisaxísticos, los retratos y autorretratos, y les figures. Cuadros d´enriba, de manzorga pa mandrecha: Baille d´Antroxu (1917), El palcu de la neña roxa (1917) y Pescadores charrando (1919).
Llingua asturiana y cultura
Jesús Rodríguez Martínez
VAN GOGH Y LA PINTURA IMPRESIONISTA
Vincent van Gogh (1853-1890). Autorretratu (1887) LA LLUZ Y EL COLOR. L´Impresionismu ye un movimientu artísticu que trata de recoyer les
impresiones que produz la realidá. Esta forma de ver l´arte surdió en Francia nel postrer terciu del sieglu XIX, promovida por pintores como Manet, Monet, Pisarro, Renoir, Degas o Cézane. Énte l´intelectualismu realista, el sensualismu impresionista sofítase na intuición personal, arrequexando toa conocencia teórica. Nos cuadros d´esti estilu apaecen sensaciones visuales rellacionaes enforma cola vibración de la lluz, que-yos da tonos de forma-color a los oxetos.
L´IMPRESIONISMU ARDIENTE DE VAN GOGH. Considérase a esti gran artista holandés como ún de los
más influyentes en tola pintura contemporánea. Vivió en delles llocalidaes franceses dende 1885 onde llaboró lo meyor de la so fechura pictórica. Influyío poles tendencies impresionistes, pintó retratos, paisaxes y composiciones con flores. N´Arles (1887-1888) afitó´l so estilu definitivu, un impresionismu ardiente y psicolóxicu carauterizáu por contornos ñidios, lluz ensin solombres y colores puros (colloráu y verde principalmente). Enriba, de manzorga pa derecha, amuésense obres representatives como: La ponte de Langlais (1887), Los xirasoles (1888) y El cuartu d´Arles (1888).
L´ANOVACIÓN DE LA PINTURA. Depués del ataque de llocura sufríu por Van Gogh en 1898 apaecen
obres con un ritmu esvariáu, formes disllocaes y colores rellumantes. Arriba, d´izquierda pa mandrecha: La nueche estrellada (1889), La siesta (1890) y Campos en Cordeville (1890).
Llingua asturiana y cultura
Jesús Rodríguez Martínez
PICASSO Y LA PINTURA CUBISTA
Pablo Picasso (1881-1973). Autorretratu (1906) EL CUBISMU. Ente 1907-1914 diose esti movimientu pictóricu que supunxo la revolución estética más
importante dende´l Renacimientu (sieglos XIV-XV). Los autores cimeros d´esta tendencia foron Picasso, Braque, Juan Gris y Léger. Según los cubistes la visión humana ye móvil y desendólcase nel tiempu. Los oxetos apaecen nos cuadros esquematizaos, más como podríen representase na mente que na propia realidá perceutible. D´esti mou, empléguense como base les figures xeométriques.
LES PRIMERES ETAPES DE PICASSO. La estancia permanente en Francia dende 1907 fixo que´l xenial
artista malacitanu entrare en contautu coles artes plástiques más vanguardistes. Los anicios del pintor español rellaciónense colos periodos conocíos como: entamu de Barcelona (1895-1901), azul de París (1901-1904), rosa (1905-1907), cubista (1908-1916) y clásicu grecorromanu (1917-1927). Enriba puen vese, d´izquierda pa derecha: Les señorines d´Avignon (1907) –obra representativa cola qu´entama´l cubismu-, Natura muerta (1912), Les bañistes (1918) y Los tres músicos (1921).
LA INFLUYENCIA DE LOS NUEVOS ISMOS. Les nueves fechures de Picasso recuéyense nes époques del
so arte influyíes pol surrealismu (1928-1932) y pol espresionismu (1937-1952). Na cabera etapa del arte picassianu en Vallauris (Francia) apaecen tamién trabayos n´escultura y cerámica. Penriba, d´esquierda pa mandrecha: Maternidá (1922), Guernica (1937) y Les menines de Picasso (1957).
Llingua asturiana y cultura
Jesús Rodríguez Martínez
LLINGUA LLATINA
EL LLATÍN. Llingua indoeuropea de la triba itálica que se faló na antigua civilización romana dende´l
sieglu VIII e.C., col so orixe xeográficu na península Itálica pa la fastera del Vetus Lātium (Vieya Collada). L´alfabetu llatinu provién del griegu y del etruscu, siendo´l más emplegáu anguaño. Na actualidá ye llingua oficial na Ciudá del Vaticanu y úsase pa la nomenclatura científica (Canis lupus). LLINGÜES ROMÁNIQUES. Son les llingües que deriven del llatín y aconcéyense alredor del asturianu,
gallegu, castellanu, catalán, francés, italianu, portugués, rumanu, provenzal, retorrománico, dalmáticu (desapaecíu nel sieglu XIX) y sardu. AUTORES CIMEROS DE LA LLITERATURA LLATINA. Plauto (254-184 e.C.): comediógrafu elegante y bien
reflexivu, autor de L´Aulularia. Lucrecio (99-55 e.C.): naturalista ya historiador de la ciencia qu´escribió De rerum natura. Cicerón (106-43 e.C.): quiciabes l´autor romanu más importante, autor de Les Catilinaries. Virxilio (70-19 e.C.): gran poeta de la tradición greco-llatina, fixo poesíes épiques como La Eneida. Séneca (4 e.C.-65 d.C.): filósofu hispano-romanu, autor del tratáu De clementia.
DECLINACIÓN LLATINA
ASTURIANU
VARIANTE DIALEUTAL
CASTELLANU
1ª 1ª 1ª 1ª 1ª 1ª 1ª
lunā-ae littera-ae insŭla-ae faba-ae fāma-ae amicitia-ae magistra-ae
lluna lletra islla faba fama amistá maestra
l.luna (occidental) l.letra (occidental) isla (occidental) h.aba (oriental) h.ama (oriental) amistá maestra
luna letra isla haba fama amistad maestra
2ª 2ª 2ª 2ª
rīvus-i magister-magistri studium-i ferrum-i
ríu maestru estudiu fierru/o
río-u (occidental) maestro-u (occidental) estudio-u (occidental) h.ierru (oriental)
río maestro estudio hierro
3ª 3ª 3ª 3ª 3ª
lex-lēgis lūmen-luminis vetus-veteris homo-hominis pons- pontis
llei llume vieyu/o home ponte
l.lei (occidental) l.lume (occidental) viel.lo-u (occidental) h.ome (oriental) ponte
ley lumbre viejo hombre puente
4ª exercitus-ūs 4ª fructus-us 4ª gelu-gelus
exércitu frutu xelu
exército-u (occidental) fruito-u (occidental) h.elu (oriental)
ejército fruto hielo
5ª rēs-rei 5ª fides-fidĕi 5ª diēs-diēi
cosa fidelidá día
cousa (occidental) h.idelidá (oriental) día
cosa fidelidad día
Llingua asturiana y cultura
Jesús Rodríguez Martínez
LLINGUA CASTELLANA
LA LLINGUA CASTELLANA. Llingua romance -derivada del llatín- qu´entamó constituyise en dalgunes
fasteres de la península Ibérica, dende´l sieglu XI, como Cantabria, La Rioxa y Estremadura. La so unificación llingüística diose col rei castellán-lleonés Alfonso X, El Sabiu (1221-1284), demientres que l´espardimientu suyu trescurrió al empar de la Reconquista (722-1492) y del puxu de la Corona de Castiella dende los anicios de la Baxa Edá Media. DOMINIU LLINGÜÍSTICU DEL CASTELLANU O ESPAÑOL. La colonización ultramarina, que fixo la
Monarquía Hispánica a la fin del sieglu XV y al entamu del XVI, dio llugar a un espardimientu del castellán per delles fasteres xeográfiques, sobro too, per América. Amái d´España, anguaño falase español y ye llingua oficial en: Guinea Ecuatorial, Costa Rica, Cuba, República Dominicana, El Salvador, Guatemala, Hondures, México, Nicaragua, Panamá, Puertu Ricu, Arxentina, Bolivia, Chile, Colombia, Ecuador, Paraguái, Perú, Uruguái, Venezuela y nos estaos norteamericanos de Nuevu México y Florida.
LA LLITERATURA CASTELLANA TRADICIONAL. Los primeros documentos conservaos en castellán son
les h.arches (s. XI), escrites en mozárabe. El primer testu lliterariu, propiamente dichu, atopáu ye El Cantar del Mio Cid (1140) qu´amuesa la sociedá xuglar de la dómina. Nel sieglu XV destacaron Jorge Manrique -Coplas a la muerte de su padre (1476)-, y Fernando de Rojas -La Celestina (1499)-. Nel sieglu XVI apaez la obra cimera de la novela picaresca española, l´anónima Lazarillo de Tormes (1554). Yá nel sieglu XVII, o Sieglu d´Oru, son fundamentales El Quijote (1605) de Miguel de Cervantes, El Buscón (1626) de Francisco de Quevedo, la obra teatral Fuenteovejuna (1613) de Lope de Vega, y La vida es sueño (1636) de Pedro Calderón de la Barca. LA LLITERATURA ESPAÑOLA MODERNA Y CONTEMPORÁNEA. Nel sieglu XVIII ye representativu Luis
Fernández de Moratín, qu´escribió la comedia neoclásica El sí de las niñas (1806). Nel sieglu XIX son cimeres la poesía de Becquer -Rimas (1860)-, y la novela hestórica de Pérez Galdós -Episodios Nacionales (1879)-. La Xeneración del 98 trató´l tema d´España al traviés de grandes escritores como Pío Baroja -El árbol de la ciencia (1911)-, o Antonio Machado -Campos de Castilla (1912)-. Na vanguardista Xeneración del 27 hai de citar, sobro too, a García Lorca -Romancero Gitano (1928)- y a Rafael Alberti -Poesía (1967)-. Na lliteratura más actual son perimportantes les aportaciones de los Nobel de la lliteratura hispana y americana como Camilo José Cela -La Colmena (1951)-, Gabriel García Márquez -Crónica de una muerte anunciada (1981)-, y Mario Vargas Llosa –El pez en el agua (1992)-.
LLATÍN
CASTELLANU
ASTURIANU
VARIANTE DIALEUTAL
fīlia-ae lupus-i plēnus-a-um latus-lateris formica-ae famēs-is rex-rēgis
hija lobo lleno-a-o lado hormiga hambre rey
fía llobu llenu-a-o llau formiga fame rei
fiya (occidental) l.lobu (occidental) l.lenu-a-o (occidental) l.lau (occidental) h.ormiga (oriental) h.ame (oriental) rei
Llingua asturiana y cultura
Jesús Rodríguez Martínez
LLINGUA FRANCESA
IDIOMA FRANCÉS. El francés ye una llingua románica -vien del llatín- que s´afitó ente los sieglos
VIII-XV. Los documentos lliterarios más antiguos que se conocen son del sieglu IX, como´l Poème de Saincte Eulalie. La llingua francesa fálase anguaño, amás d´en Francia metropolitana y los sos Departamentos d´ultramar, en Bélxica, Luxemburgu, Suiza y Canadá. Tamién se caltién n´antigües colonies africanes, como per exemplu: Marruecos, Túnez, Camerún, Arxelia y Senegal. LLITERATURA FRANCESA. Na Edá Media apaez el cantar de xesta La Chanson de Roland (s. XI),
escritu en dialeutu anglo-normandu. Nel teatru universal del sieglu XVII destacó enforma Moliere, cola so obra tráxico-cómica Le Tartuffe (1664-69). Los novelistes más importantes del sieglu XIX son el realista Victor Hugo -Les Misérables (1862)-, y el naturalista Émile Zola -Une page d´amour (1888)-. Los autores franceses del sieglu XX desendolquen una lliteratura de reflexón filosófica, como´l Nobel Jean-Paul Sartre -L´Être et le Neant (1943)-.
LLATÍN
FRANCÉS
ASTURIANU
VARIANTE DIALEUTAL
CASTELLANU
stella-ae lunae dies liber-libri saccharon-i nox-noctis legere herba-ae fēmina-ae fīlius-ii fons-fontis pons-pontis facere arma-ōrum legio-legiōnis
étoile lundi livre sucre nuit lire herbe femmelle fil fontaine pont faire arme légion
estrella llunes llibru azucre nueche lleer yerba fema fíu fonte ponte facer arma lexón
estrel.la (occidental) l.lunes (occidental) l.libro-u (occidental) azúcare (occidental) nueite (occidental) l.leer (occidental) herba (oriental) h.embra (oriental) h.iyu (oriental) h.uente (oriental) puente (oriental) h.acer (oriental) arma lexón
estrella lunes libro azúcar noche leer hierba hembra hijo fuente puente hacer arma legión
FRANCÉS
ASTURIANU
CASTELLANU
Pres. Ind. verbe ÊTRE
Pres. Ind. verbu SER
Pres. Ind. verbo SER
je suis tu es il/elle est nous sommes vous êtes ils/elles sont
yo soi tu yes él/ella ye nós somos vós sois ellos/elles son
yo soy tú eres él/ella es nosotros/as somos vosotros/as sois ellos/ellas son
Llingua asturiana y cultura
Jesús Rodríguez Martínez
BIBLIOGRAFÍA Y MATERIALES NORMATIVOS: ALLA: Diccionariu de la Llingua Asturiana. Edita Academia de la Llingua Asturiana. Uviéu, 2000. ALLA: Gramática de la Llingua Asturiana. Edita Academia de la Llingua Asturiana. Uviéu, 2001. ALLA: Normes ortográfiques. Edita Academia de la Llingua Asturiana. Uviéu, 2005. BALASCH, M. Y LLOPIS, L.I.: Latín Forum. Edición de Vicens Vives. Barcelona, 1992. LASTRA, C. ET ALII: Especies protegidas en Asturias. Edita Asociación d´Amigos de la Naturaleza. Uviéu, 2005. MANZANO, P. Y RODRÍGUEZ, U.: Diccionariu Básicu de la Llingua Asturiana. Ediciones Trea. Gijón/Xixón, 2001. MARTÍN MARCOS, P. ET ALII: Una historia de Astures y Romanos. Edita FMC, Educación y UP (Departamentu de Programes Educativos). Ayuntamientu de Gijón/Xixón, 1993. MARTINO RUZ, X.: Diccionariu ilustráu de la llingua asturiana. Editorial Picu Urriellu. Gijón/Xixón, 2005. MARTINO RUZ, X. ET ALII: Xeitu. Manual pal deprendimientu de la Llingua Asturiana . Edita Academia de la Llingua Asturiana. Uviéu, 2008. NAVARRO, F. ET ALII: Enciclopedia Salvat. Salvat Editores. Barcelona, 1997. PUY COSTA, M.: Diccionario moderno de los idiomas francés y español. Ediciones Langenscheidt. Berlín y Munich, 1996. RODRÍGUEZ LÓPEZ, M.X. ET ALII: El pallabreru del fútbol. Edición de la Oficina Municipal de la Llingua. Ayuntamientu de Gijón/Xixón, 2009. RODRÍGUEZ SOLAR, I. ET ALII: Deva peles siendes d´Andrés Manuel Solar Santurio. Edita Oficina Municipal de la Llingua. Ayuntamientu de Gijón/Xixón, 2005.
Gijón/Xixón, 31-10-2011.